इस काव्य रचना के प्रारंभिक चौबीस छंद कवित्त शैली में हैं। इन चौबीस कवित्तों में प्रारम्भिक आठ कवित्त (शैलबाला शतक: एक एवं शैलबाला शतक: दो) काली के रौद्र रूप का साक्षात दृश्य उपस्थित करते हैं। प्रारंभिक छः प्रविष्टियों (शैलबाला शतक: एक, दो, तीन, चार, पाँच, छः) में इन चौबीस कवित्त छन्दों को प्रस्तुत किया जा चुका है। इसके बाद की प्रविष्टियाँ सवैया छंद में रची गयी हैं, जो इस ब्लॉग पर प्रकाशित हो चुकी हैं। इस प्रविष्टि के साथ ही शैलबाला शतक: भोजपुरी स्तुति काव्य इस ब्लॉग पर सम्पूर्ण हो रहा है।

भाव कै भूख न भीख कै भाषा सनेह क जानी न मीन न मेखा
कवनें घरी रचलै बरम्हा मोके हाँथे न माथे में नेह की रेखा
काँप उठि जम कै टँगरी उघरी हमरी करनी कै जो लेखा
एकहु बेर हमै करुनामयि पंकिल आँखि उघारि के देखा॥९७॥

एक स्वयं हम तीत करइला चढ़े दुसरे अघ नीम के रूखै
याद जबै जमदण्ड की आवै जिया झरबेर के काँट लौं सूखै
धीरज देत सुभाव तोहार पिटात तनय तन माई कै दूखै
पंकिल पूत भले हो कसाई पै माई सदा खरजूतिया भूखै॥९८॥

बीन के पुण्यन कै बिखरे तिनका जबहीं बिरची लघु छान्हीं
चोंथ कबारि किनारे करै करुनामयि काम की भीषन आन्हीं
खोदौं पहार कढ़ी चुहिया गर्हुआत बा पाप क पोटरि बान्हीं
पंकिल हे दुखिया क मतारी उठाइ ला गोद बिठाइ ला कान्हीं॥९९॥

काम से कइसों बचाइ ला माई ई धै बरियाई बिषय सरि गोतत
कोटिक दाँत निपोरी करीं पर छोड़ै न जइसे चहै तस जोतत
अवगुन पाप चमेली क तेल छुछुन्नर पंकिल माथे पै पोतत
तोरी कृपा अन्हियार मिटी पनबादर भानु के नाहिं अलोपत॥१००॥

ऊसर बा हमरी जिनगी करि दा गिरिनन्दिनि जीवन नन्दन
मानत हौं मोरि पीर बृथा न सही बिरहागि न व्याकुल क्रन्दन
पै एतनों सच हौ असमर्थ हूँ हो न सकै तेरो अर्चन बन्दन
चाह करौं तेरे पंकज पाँव की पंकिल धूरि लिलारे को चन्दन॥१०१॥

माँगौ नहीं सुगती मुकती बल बैभव ज्ञान गुमान बड़ो जस
साचों कहौं करुनामयि अम्ब तोहिं हमरी सुख सम्पति सरबस
जौ लगि पंकिल की जिनगी जग बीच रहै दुइ चारि दिना दस
रावरे नेह क गीत सदा हमरी सँसरी में बजै बँसुरी अस॥१०२॥

आलस पुंज रुचै भल भोजन घूमल चाहै न लाठे न डाँड़े
आनै क गूर औ आनै क घीव पै भोग लगावल चाहै लँ पाँड़े
डूबि मरीं चिरुआ भर पानी में फोरै घरे सिल ठेस पहाड़े
पंकिल तों सम माई की गोद में जीबो भलो चाहे मारे कि छाड़े॥१०३॥

एक त अइसे कपूत नलायक नाचन आवै न आँगन टेढ़ा
दूजे सवार सदा सिर काम बिलाए के पंथ कै लवले बा लेढ़ा
ना मन के थिर राखै कबौं गुन अवगुन बीच भिड़वले बा मेढ़ा
पंकिल काँहें न तूँ टस से मस होखैलू बइठि निहारैलू खेढ़ा॥१०४॥

भारत देश परोस में गंग औ काशीपुरी कुल भूसुर खाँटी
अइसन पाइ संजोग अभागा ई हीरा शरीर के कइलस माँटी
पूछी के पंकिल के कुकुरा बस डाँटन जोग जौ काटी की चाटी
माई बिपत्ति हरइया तोंहीं हँसवइया सबै दुख केहू न बाँटी॥१०५॥

नाहिं टिकै पद कंज तोरे डगरै मन मोर ज्यों थारी में पारा
तोंसे दयामयि कौन दुराव मनोज के आगे चलै नाहिं चारा
तूँ जग की दुखभंजनिहार हमार छली दुरबासना मारा
देही का तोंहिं दरिद्दर पंकिल ठाढ़ बा ले जल लोचन खारा॥१०६॥

अंतक आयसु से जननी दुतवा नटई तरवार से रेती
कौनों कमाई न का करबै मोरे गॉंवे न धाम सिवाने न खेती
पंकिल लीला तोरै महामाया सुतइबी त सूती चेतइबी त चेती
रंजिस नाहिं भली लरिका से तूँ गोदी में काँहें उठाइ न लेती॥१०७॥

मोर अन्हेरपुरी नगरी उर राज करै मन चौपट राजा
लूट मँची मनमानी भवानी टका सेर भाजी टका सेर खाजा
सूतल बाड़ू की जागलि माई तूँ ले तरवार खड़ा होइ भाँजा
पंकिल ताजा रहै तोहरे बल बाजै गहागह बिक्रम बाजा ॥१०८॥

—————————–समाप्त——————————

The post शैलबाला शतक: भोजपुरी स्तुति काव्य (तेरह) appeared first on Sachcha Sharanam | सच्चा शरणम्.

जीवन बीतत जात बृथा अजहूँ चित चंचल चेतत नाहीं

The post शैलबाला शतक: भोजपुरी काव्य रचना (बारह) appeared first on Sachcha Sharanam | सच्चा शरणम्.

चाही न बाउर के कछु आउर नेह क तूँ जेवनार बनावा
बोलि के खेलत पंकिल लाल के ले गोदिया दुलराइ जेंवावा
मद्धिम होन न पावे कबौं सुधि दीपक कै बतिया उकसावा
आग लगे का कुँआ खोदबू मुँह फेरा न माँ अँखिया से गिरावा॥७३॥अवगुन जाल फँसी जिनगी न बवाल ओराय कबों ओरियावल
जन्म हजारन के अघ की गठरी पर बा गठरी जोरियावल
जाई सही जमदूतन से अघ पंकिल प्रान बड़ा लतियावल
काहें के दूलम कइलू तोहूँ जननी अपनों बोलबो बतियावल॥७४॥

लालन कै मॅुंहवाँ मुरझै मत राखैलु आँचर ओट छिपाई
सातो समुन्दर सूखी पै माई तोरे उर कै दुधवा न ओराई
देखि तनय मुख स्वेद बिहाल तू पंकिल शोनित देलू बहाई
का करुना चुकलीं सिगरी घर फूँक तमाशा निहारैलू माई॥७५॥

बइठल तूँ चुप कइसे निहारैलू काम कसाई हमै धरि पीसत
रंचक जौ अँकुरै अनुराग त सोर उखारि के लातन मीसत
तोहूँ से काम कि भइलैं बली इहै पंकिल सोच करेजे में टीसत
दूधौ नहाय औ पूतों फरै जग जाको मोरी जगदम्ब असीसत॥७६॥

अन्तर मोर अन्हार गली न खिली रउरी अनुराग की राका
भाव सुगन्ध विदा उर से भवभामिनि नैन उघारि के ताका
मोर हृदय गढ़ तोर मच्यो तॅह पंकिल काम को धूम धड़ाका
पूत पुकारत हे दुख हारिनि जागा तोहार झुकै न पताका॥७७॥

कूदै सदा चढ़ि क्रोध कपारे मनोज करै बरजोर चढ़ाई
मत्सर की मुँगरी मुँह फोरत घोर करै अभिमान खिंचाई
आठो घरी घोरियवले घृना बिषयान की रात दिना पहुनाई
माई कोंहइलू कि गइलू ओंहाय कि पंकिल की न सुहाय रोआई॥७८॥

ज्यौं निरमोही तोंहिं बनबू फिर जाइ बसी कँहवाँ ममता रह
ना सुनली कि बेहाल तनय के बिहाइ मतारी हो नौ दू इग्यारह
कइसन माई हऊ नाहिं सालत कोढ़ में खाज गयो करजा रह
नैन उघारि निहारा बजै सुत पंकिल के चेहरा पर बारह॥७९॥

उफ्फर का तोहउँ डलबू अब जेके कहीं पुछवइया न कोई
सोचैलू पूत बड़ा तोहरे बिन बोले कि काग बिहान न होई
लेकिन माई हौ माइयै बइठल जोहै ले पैंड़ा बनाय रसोंई
बउरहवा बिलखै सुत पंकिल कइसे करेज न तोर करोई॥८०॥

तूँ सुत के नहवाइ सजाइ के भेंजैं लू खेलै दिठौना लगा के
आपस में अझुराइ कोंहाइ के लौटै घरे मुँहवाँ लटका के
पंकिल पागल होखैलू दइया रे का के खियवलस कइलस का के
हाय ऊ गइलैं दुलार कहाँ धँसि डूबि मरीं जननी कँह जा के॥८१॥

ऊपर से भल लागै भले भींतरा करतूत महान घिनौनी
काम के नाम पे नानी मरै पर नीच के चाही करेर नचौनी
सोझे मुँहें केहु बातो न पूछत बा सबकी टेढिअइलै बरौनी
पंकिल चउपट खम्भ के त्यागि के तोंहू बना मतवा मत मौनी॥८२॥

जौ सुत भार अँगेजै में काँपैलू काँहे मतारी क नाँव धरउलू
की हमके कढ़लू खोंढ़रा से न थारी बजउलू न सोहर गउलू
जौं जनलू कुल बोरन होइहैं त कॉंहें न माहुर घोर पियउलू
पंकिल की बेरियाँ मँहतारी तूँ ऊसर भइलू कि दूसर भइलू॥८३॥

अवगुन एको न बाचल बा अघिया करतूत में जव जव आगुर
लायक ना तोहरे जग जोग न दूनौं ठईं करनी से लजाधुर
त्रास धनी जन कै जम कै न घरे क न घाटे क धोबी क कूकुर
पंकिल कै दुखवा बूझिहा मुँहवाँ तोर ताकत टूकुर टूकुर॥८४॥

Photo Source: Google, Wikipedia

The post शैलबाला शतक: भोजपुरी स्तुति काव्य (ग्यारह) appeared first on Sachcha Sharanam | सच्चा शरणम्.

ई दुनिया मोटरी टकटोरैले एक तोंहिं पोटरी देखवइया
दीन निहारि होंकारि के धावैलू जइसे पेन्हाइल कामद गइया
लाख असीसैलू जूड़े रहा हमरो उमरी ले जिया मोर भइया
पंकिल कै कहिया हरबू दुख नाचै सिरे साढ़े साती अढ़इया ॥६१॥

आपन जामल लाख गदाई न माई कबौं सुत खाईं में भेंजी
कइसे मतारी दुखारी तनय तजि आनन ढॉंकि परी सुख सेजी
छोड़े बनी नाहिं पंकिल जेकर जायल पोवल उहै सहेजी
बउरहवा डुहुरै बम्हना तूँ बना जननी मत काठ करेजी ॥६२॥

दीन मलीन गलीन गलीन फिरीं रिनियाँ पट अन्न न आँटत
अम्ब ओराय रही जिनिगी नित पेवन पै पुनि पेवन साटत
ना जेकरे चलहू क सहूर ते सौ पुरुखा उदघाटत डाँटत
पंकिल कै दुख देखि दयामयि कइसे करेज तोहार न फाटत ॥६३॥

पूत करोरन तोर धरा बिच हौं सबते पर अम्ब अनारी
बूझि परै कछु लाभ न हानि हनी निज हाँथहिं आपु कुदारी
ई सुखवा छिनिहा कबहूँ मत चाटि जियीं तोरि जूठन थारी
पंकिल के बूझिहा बेटवा अस भइया के भूलि न जइहा मतारी ॥६४॥

सोच में फूलत बा पेटवा बेटवा कहिके कहिया टेरबू तूँ
भूलि सुपन्थ कुपंथ में धावत लाल के बॉहिन में घेरबू तूँ
अंक ले ऑचर से मुँह पोंछ दुलारि हिये की व्यथा हरबू तूँ
पंकिल के रखबू पजरा नाहिं माई कबौं मॅुहवॉं फेरबू तूँ ॥६५॥

तूँ थकबू तोर पउवाँ पिराई न मो सम नीच मिली धरनी में
अंगनि अंगनि अवगुन व्यापल माहुर घोरल बा करनी में
ऊबत ना नख से शिख डूबल भोग की भीषण बैतरिनी में
कवनों बिधान रचा मन पंकिल लीन रहै शिव की घरनी में ॥६६॥

तूँ छिपि गइलू पराइ कहाँ फुसिलाइ के माई थमाइ खेलवना
पौरुष का छिपलैं तोंहसे मोर अम्बर चूमी कि बाँगुर बौना
साटि हिये सुत के सिगरी निशि अम्ब बितावै ले ओदे बिछौना
कइसे सहाई मतारी के पंकिल पूत क मउवत बेटी क गौना॥६७॥

काने मुहें तेलवा डलले मुँहवाँ ओरमाइ का बइठल बाटू
की अघ मेटै क बानि बिसारि निवारि सनेह उमइठल बाटू
मानल जालू महा सोझिया पर पूतै पै रूठ के अँइठल बाटू
पंकिल से के अघी जेकरे हियरे मल पोंछै के पइठल बाटू ॥६८॥

पाहन जौ तोंहऊॅं बन जइबू त माई क नाँव ओराई धरा से
के बिलखात निरीह बेटउवा कै आँस हरी अँगुरी अँचरा से
दूसर के मोर मेंटी पियास सबै सुर धोख धुआँ बदरा से
पंकिल कै कहलो सुनलो अब माफ करा मत जा पॅंजरा से ॥६९॥

गाढ़े सकेते तोहिं एक आँटैलू अइसन माई मिली कहाँ मोही
के सुत कै तकतै मॅुंह जीही ले अँवटल दूध कटोरी में जोही
लाख नलायक बा बेटवा पर राखे बनी चाहे काटी बकोटी
पंकिल की तजि के ममता न बना मतवा अब तू निर्मोही ॥७०॥

तूँ जोड़तै थकबू जननी अघ मोर कबौं गिनले न ओराई
छाला पड़ी तोहरे कर में पतरी नरमी अँगुरी घिसि जाई
बेंची ला मॉंस सदा तोहरै शशिशेखर की घरनी मोर माई
पाछिल चूक बिसारि के पंकिल पूत के ला गोदिया में उठाई ॥७१॥

सूखल जाला सदा बचवा बचवा कहतै मुँहवाँ तोर माई
देंह करोर धरे पर भी कबहूँ करजा न तोहार भराई
लाख उधातम कै सुत पोसैलू पूत बदै तन खून जराई
खूँटहिं के बल नाचत बाछा हौं पंकिल पूत तोहार तूँ माई ॥७२॥

The post शैलबाला शतक: भोजपुरी स्तुति काव्य (दस) appeared first on Sachcha Sharanam | सच्चा शरणम्.

शैलबाला शतक: स्तुति काव्य: सवैया 49-60

छोड़ैलू तू न कबौं हमके हमहीं तोहके हइ अम्ब भुलायल
मोर करी एतना के दुलार सनेह से नैना तोहार छछायल
पूत के लागत चोट पै होत है हाय करेज मतारी को घायल
अइसन पीर भरा तोहरे हित पंकिल प्रान रहै पगलायल ॥४९॥

भोग क जूठन पत्तल चाटत त्यागि के प्रीति परोसल थाली
खोज के तू थकबू जग में हमरे अस पइबू न पूत कुचाली
मो सम पापी न पाप विनाषिनि तों सम जोरी बनी है निराली
पंकिल कारिख पोतनहार पै तूँ रखवार सदा मुँहलाली ॥५०॥

छोह न छीजै दा आपन तूँ चाहे मारा मुआवा घरे से निकाला
आग में भूँजा पहार से झोंका या खउलत तेल कराह में डाला
चाहे हॅंसावा रोआवा गवावा या पंकिल बन्द करा मुँह ताला
पै अपने सुधि के दुधवा कै न ठाला कबौं करिहा गिरिबाला ॥५१॥

ज्ञानी गुनी न धनी जननी हमरी फुहरी मति अवगुन पूरी
चाल कुचाल कहाँ ले कहीं मुँह राम रटीं रखि काँख में छूरी
अवगुन पंक में डूबल कै पँखुरी धरि काढ़ा रखा मत दूरी
चाकर राखि मजूरी में दा निज पंकज पाँव की पंकिल धूरी ॥५२॥

नाहिं बली मन मानै छली थकलीं बिधि कोटिन्ह दाँत निपोरी
पापन कै परस्यो पकवान निहारि न छूटत जीभ चटोरी
चोट चपेटन में लटि पंकिल पूत तोहार करै हथजोरी
का पइबू मुअले के मुआइ दयामयि माइ बना न कठोरी ॥५३॥

जापै फिरै करुना कोनवा सोनवा बरिसै वोहि रंक की झोरी
अंधहिं सूझत मुरुख बूझत धावत पंगु पहार की ओरी
पारबती पसिजा कर राखि कृपानल अँवटल दूध कटोरी
पंकिल पूत के ले गोदिया बनि जा हिमशैलसुता लरिकोरी ॥५४॥

जानी न कवनें दिना तन से मोरे जीवन कै सुगना उडि जइहैं
काँपत बा टँगरी पँखुरी धइ के यम कै दूतवा घिसियइहैं
रात दिना छछनी जियरा अँखियान के कोर से लोर छँछइहैं
पंकिल माई बदे बिलखाई दयामयि ऊ दिनवाँ कब अइहैं ॥५५॥

जौ सच हौ जननी जग में जे करी जवनें फल चाखा
तौ सत देंह धरे पर भी न कबौं हमरी पुरिहैं अभिलाषा
पाप के पेड़ क सोर कबारा कि फेर कबौं पनपै मत साखा
आपन पंकिल प्रीति दिया धरि बारा उमा हमरे उर ताखा ॥५६॥

एक न छ छ अरी घेरले जे जहैं हमैं पाई तहैं हुरपेटी
काम अहेरी कुसंग के जाल में लेत विचार बिहंग लपेटी
माई बिना बिपदाइल पूत के के अपने अँकवारी में भेंटी
पंकिल के बिसरइया न मइया हिमालय की दुलरइतिन बेटी ॥५७॥

क्लेसन में कुँहुसै जिनिगी मति भ्रष्ट ढँकी अघ के चदरा
धमधूसर के उर ऊसर में बरसी कब तोर कृपा बदरा
कहिया खोजिया करबू मतवा बितलीं केतना रोहिनी अदरा
सुभ कौन मुहूरत सोचैलू धाम घरी में जरै नौ घरी भदरा ॥५८॥

में में करै केतनो बकरी पर जइसे छुरी न तजै निठुराई
तइसइ काम कसाई कुघात करै न सुनै थकलीं रिरियाई
का जग मात करीं जिनिगी भर जियै के बा छठियै में ओझाई
सूझै इहै कि उमा पग धै बिलखा मन पंकिल माई हो माई ॥५९॥

होइहैं हँसाई तोरो बहुतै उधिराई जो माई ई बात अनोखी
पंकिल दोखी तनय जमलैं अस शीलमई मँहतारी की कोखी
तू अस मोही कबौं सुत की सह पावै लू का खर सेवर खोंखी
पंकिल पाप कि तोर दया का गर्हू बा बिचार तराजू में जोखी ॥६०॥

The post शैलबाला शतक: भोजपुरी स्तुति काव्य (नौ) appeared first on Sachcha Sharanam | सच्चा शरणम्.

The post शैलबाला शतक: भोजपुरी स्तुति काव्य (आठ) appeared first on Sachcha Sharanam | सच्चा शरणम्.

हे हिमशैल सुता सुत पै ममता में करा मत माँ कोतहाई
केकर ताकीं दुआरी मतारी बिना के हमारी हरी अधमाई
भोला के भौन की माँ भनडारिनि काहें मोरि विपदा बिसराई
पंकिल की जनि छाड़ कलाई दयामयि माई दोहाई दोहाई॥२५॥

माई बतावा बिना पद पंकज पवले कि प्रान अली सुख मानी
नाहीं सुहाई तनय दुधमूँह के शेष सुरेसहुँ की रजधानी
हे जगदम्ब कहाँ ले चढ़ाईं न चाउर चूँग न सोना न चानी
रोज भरा मोरि पंकिल आँखिन आपन पाँव पखारै के पानी॥२६॥

बीर बड़े षट चोर चढ़े जगदम्ब हमारे हिये की अँटारी
पूत लुटात तू सोवति मात विकार की घोर घिरी अँधियारी
मोको जगाइ करेजे लगावहु काकी नहीं बिगरी तूँ सुधारी
भोला-सो लायक बाप सुन्यो नहिं गौरी-सी लायक नाहिं मतारी॥२७॥

सीचौं न औढरदानि परानि बिलोचन पानी सों प्रेम को पौधा
पाप पयोनिधि पैरत थाक्यों पगे न जुरी पनहीं चमरौधा
पंकिल आस पियासन धाइ पर्यौ लटुआइ रह्यौ चकचौंधा
माई दुआरे परी अरजी कलपद्रुम होइहैं कबौं कुकुरौंधा॥२८॥

सोचौं निरीह महाधूसर ऊ दिनवॉं जननी कब अइहैं
पंकिल रावरे पंकज पॉंय की लोचन नीर से धूरि बहइहैं
झंखै मनोरथ की कनियॉं उड़ि जइहैं ओहार कँहार परइहैं
के ए भिखारी क झोरी निहारी न जौ लों मतारी क माया छछइहैं॥२९॥

आन्हर में कनवाँ नृप ह्वै जगदम्ब रजाई की बाँधे हौं गाँती
डोलत काँपौं टटोलत मारग बोलत में नटई सहराती
अइसो अघी तुम ते कछु चाहत बाजै सुराग कि गाँडर ताँती
हौ जिय माँहि भरोसा इहै नाहि माई क होइहैं कसाई सी छाती॥३०॥

राखि उछंग निरीह लला को पियावहु प्रान सजीवनि घूँटी
रंक को कीजै निसंक दयामयि चाहत होंन निलाम लँगोटी
नानी घरे ननियउरा बखानत सूझ जुआरिहिं आपन गोटी
हाय दई हम क्यों न भयों महिषासुर के भईंसा की चमोटी॥३१॥

कासों सुनाऊँ दसा अपनी सब भागत जइसे करीं कछु टोना
बइठि कहीं केकरे पजरे अपनी फुटही तकदीर क रोना
कॉंहें न एकहुँ बेर निहारैलू माई उघारि के आँखी क कोना
की अइसैं बितिहैं जिनगी कहिं चाटत जूठ बटोरत दोना॥३२॥

पहिले पोसलू दुलरउलू परी जननी हमरे उदरे बिच पेटी
छाड़ु न पंकिल की बहियाँ बरु मारहु माई दबाई नरेटी
ई दुनियाँ हमरे पर थूकत के हमके अँकवारी में भेंटी
माई सम्हारि के राखा ई भागै न डोमे के धामे बखानल बेटी॥३३॥

आनन फेन बहै मृग बारि में धावत सूझै बतास न बेना
का बिधि ह्वै जठरागिनि सीतल बीतल चेट को चारि चबेना
पंकिल आँखिन में पर्यो चन्नर यों ढरकौं लुटिया बिन पेना
आज हुँकारी मतारी भरा फिर ऊधौ क लेना न माधौ क देना॥३४॥

कासे कहौं जिय की जरनी अपने सुख को सपनों भयो फीको
हौ जग रीति इहै जगदम्ब कि माथ निहार के सेन्हुर टीको
कै बजनी पहिर्यौं कछनी पर लाज मरौं नहिं नाचनौ नीको
हौं कितनों बदल्यौं परिवेश गनेश भयों पर गोबर हीको॥३५॥

तूँ अँखिया मुँदबू मतवा तब के हमके बचवा गोहरइहैं
माथै पै हॉथ दे चूमत चाटत ए टुअरा संगे के बतिअइहैं
पंकिल के जनमउलू अकारथ ई घुरफेकन साँझैं बिलइहैं
तूँ जब जोर लगइबू मतारी त ओरी क पानी बड़ेरी सिधइहैं॥३६॥

The post शैलबाला शतक: भोजपुरी स्तुति काव्य (सात) appeared first on Sachcha Sharanam | सच्चा शरणम्.

जीवन निररथक मोर बीतल जात मात
कृशगात बिलखात फिरत जग झंझावात में
सुख सम्पति संचय रत वंचित नित होत जात
उलझि अकारथ सुत तात मात भ्रात में
स्वाती कै पानी बन के बरसा तू भवानी
पापी पंकिल पपीहरा के आनन सुखात में
मूढ़ मन मृग नइयाँ भटकि भटकि मरत अम्ब
लोटै दा अपने मंजु चरननि जलजात में ॥२१॥

देखि सुनि कोटि मत माथा चकरात मोर
देवता करोरन बीच केके हम भजबै
सब सुर चाहत सेवकाई पहुनाई सेवा
सम्पति अधिकाई हम कौने भॉंति गॅंजबै
जेके जवन भावै आपन डफली उठावै
आपन आपन राग गावै हम कॉंहें के बरजबै
हम तै सुखकारी शिवमानस विहारी
हिमशैलजा मतारी कै दुआरी नाहिं तजबै॥२२॥

एको बेर आपन पद पंकज देखाय देतू
हमके चढ़ाय निज लीला सुधि पालकी
बॉंहिन के हिंडोला में झुलावा दुलरावा मत
ख्याल करा पंकिल कपूत के कुचाल की
एतना अपने रंग बीच बोरा चभोरा हमै
तोहॅंके छोड़ आवै सुधि आज की न काल की
पंकिल झूमि गावै जस ताली बजावै बोलै
जय जय हिमशैलसुता शंकर शशि भाल की॥२३॥

हउवैं के गनेश के रमेश के दिनेश इन्द्र
बरम्हा बिशुन कोटि देव जानि कछु हम ना
जेकरे पर माई मोरि दाहिनदयाल रहबू
ओह सुत के सौ सौ जमराजो कै गम ना
आउर सुख सम्पति हमैं दिहा चाहे छीन लिहा
एतना मोर जीवनधन होखै कबौं कम ना
रोय रोय तोहरे आगे अम्मा रोज बिनवल करै
पंकिल बेटउवा बउरहवा दीन बम्हना ॥२४॥

The post शैलबाला शतक: भोजपुरी स्तुति काव्य (छः) appeared first on Sachcha Sharanam | सच्चा शरणम्.

प्रस्तुत हैं शैलबाला शतक के चार और कवित्त! करुणामयी जगत जननी के चरणों में प्रणत निवेदन हैं यह चार कवित्त! शतक में शुरुआत के आठ कवित्त काली के रौद्र रूप का साक्षात दृश्य उपस्थित करते हैं।  पिछली चार प्रविष्टियाँ सम्मुख हो चुकी हैं आपके। शैलबाला-शतक के प्रारंभिक चौबीस छंद कवित्त शैली में हैं। शेष सवैया छंद में रचे गए हैं। क्रमशः प्रस्तुतियाँ शैलनन्दिनी के अनगिन स्वरूप उद्घाटित करेंगी। आज पाँचवीं प्रस्तुति। पिछली प्रविष्टियाँ:एक, दो, तीन, चार। ऑडियो: एक, दो, तीन, चार

शैलबाला शतक: कवित्त 17-20

तोहरै शक्ति भक्ति कै भरौसा हौ प्रधान अम्ब
आउर कुछ रखल हौ न राह में न राही में
देखतै हऊ भूँजि भूँजि भरता निकाल लेत
पंकिल कै काम औंटि मोह की कराही में
हॉंफत तनय पर अपने अँचरा कै बयार करा
रखले रहा करुना कलपद्रुम की छॉंहीं में
केसे मॅुह बाईं हम कहॉं कहॉं धाईं अब
दोहाई दुर्गा माई कै उठावा निज बाहीं में॥१७॥

अम्मा अन्नपूरना अपरना तोहिं पंकिल कै
बीना बना बादक बना राग बना रागिनी
आखिर महॅंतारी बिना बिपदा के निवारी
हम तै दुखिया सुत कहतै रहब आपन जठरागिनी
पंकिल के मति की मलिकाइन बना गउरा माई
चाहे बनावा बड़भागिनि अभागिनी
मत मुँह फेरा अम्ब एको बेर हेरा
जुगल चरनन में बसेरा दा महेश अरधांगिनी॥१८॥

कै कै बेर अम्मा खेल कइके देख लेहले हऊ
केतना भोग भोगली हम अपने बल बूती में
लालची लबार बेसुमार सुख चाहीं पर
सरबस चढ़वली नाहिं शंकर शिवदूती में
सुनीला तूं देखतै भर में कायाकलप कइ देलू
वैभव बिखेर देलू भोला की भभूती में
अक्किल लगावा पंकिल तोहरे बिना विकल रहै
माथा मोर टिकल रहै माता तोरि जूती में॥१९॥

सुख कै सुख हऊ सकल आनॅंद कै आनॅंद हऊ
तैंतिस कोटि सुर में सरबोत्तम गिनन जालू तूँ
बेटवा के बैरिन बदे बज्जर अस कठोर हऊ
सुत कै दुख देखि मोमनइयॉं पिघल जालू तूँ
पंकिल निकम्मा आखिर हउवैं अम्मा तोहरै पूत
काहें के बचाय के निगाह निकल जालू तूँ
चेहरा मोर फीका अब लगावा नेह टीका तनि
बताय दा तरीका जासे मइया पिघल जालू तूँ॥२०॥

काठिन्य निवारण

भूँजि भूँजि– भुन-भुन कर;  औंटि– अत्यधिक उबालना;  निवारी– निवारण करना;  गउरा माई- गौरी माँ;  कै कै बेर– न जाने कितनी बार;  लबार- बहुत बोलने वाला;  सरबस- सर्वस्व;  मोमनइयॉं- मोम की भाँति ।

The post शैलबाला शतक: भोजपुरी स्तुति काव्य (पाँच) appeared first on Sachcha Sharanam | सच्चा शरणम्.

शैलबाला शतक: भोजपुरी स्तुति काव्य के चार और कवित्त प्रस्तुत हैं! करुणामयी जगत जननी के चरणों में प्रणत निवेदन हैं कवित्त! शतक में शुरुआत के आठ कवित्त काली के रौद्र रूप का साक्षात दृश्य उपस्थित करते हैं। पिछली तीन प्रविष्टियाँ सम्मुख हो चुकी हैं आपके। शैलबाला-शतक के प्रारंभिक चौबीस छंद कवित्त शैली में हैं। शेष सवैया छंद में रचे गए हैं। क्रमशः प्रस्तुतियाँ शैलनन्दिनी के अनगिन स्वरूप उद्घाटित करेंगी। प्रविष्टि में बाबूजी की ही आवाज में इन कवित्तों का पाठ भी प्रस्तुत है।

पिछली प्रविष्टियाँ : एक, दो, तीन। पिछले ऑडियो: एक, दो, तीन।

शैलबाला शतक: कवित्त 13-16

कोमल कोमल अँगुरिन कै पोर मोरे पलकन पर
फेरि फेरि पंकिल के जननी जगवले जा
अइसन गुनवन्ती माई पाइ दुबराईं काहें
दुखिया के नेह कै मलाई चभवले जा
काहें करेजवा कठोर कइ के बइठल हऊ
अम्ब अपने दुधवा कै लजिया बचवले जा
आवा आवा अम्मा अपने बेटा कै बॉंह गहा
बोला बतियावा खेलावा दुलरवले जा॥१३॥

बरम्हा तोहरे दुअरे कर जोर मुँह जोहल करैं
नाच गड़थइया तूँ नचाय देलू भोला के
जगपालक हरि के जोगनिद्रा में सुताय देलू
अॅंगुरी पर नचावल करैलू सृष्टि गोला के
ढरैलू तब करुना कै अथाह सिन्धु बन जालू
कोपै लू रण में तब तोहरे आगे होला के
सुत बेसहारा के मतारी कै बल होला
एको बेर देख लेतू पंकिल के झोला के ॥१४॥

तोहरै अवलम्ब जगदम्ब हौ विशाल हमैं
लेलू तूं उबार केतनो भारी विस्फोट में
कहहू के परै न अपने आप पलक झॅंप जाले
जग जननी ऑंखिन के पुतरी की चोट में
काहूँ भॉंति राखा पर दाहिन दयाल रहा
पंकिल पगला के हर परिस्थिति बड़ छोट में
आपन नेह चारा बेसहारा के चूँगावल करा
दुखिया के रखा अम्मा अॅंचरा की ओट में॥१५॥

कॉंहें बदे माई महटियाइल हऊ बेटा तोहार
कींचड़ में परल करत छपर छपर हौ
कौने दिन खातिर रोक रखले हऊ केकरे बदे
उर में जवन तोहरे बहत करुना निर्झर हौ
कबौं नाहिं कतहॅूं अस सुनल गयल जग जननी
कौनो महतारी कै करेजा बज्जर हौ
दुअरे ठाढ़ पंकिल गोहार करै दुर्गा माई
देखा बम्हना कै कवनों दूसर नाहिं घर हौ॥१६॥

काठिन्य निवारण

अँगुरिन- अँगुलियाँ; दुबराईं- दुबला होना/कृश होना; चभवले- छक के खिलाना; ढरैलू- करुणायुक्त होना; कोपै- क्रोधयुक्त होना; मतारी/महतारी- माँ; महटियाइल हऊ- उदासीन हो; बज्जर-वज्र; गोहार करै- पुकारना; बम्हना-ब्राह्मण।

The post शैलबाला शतक: भोजपुरी स्तुति काव्य (चार) appeared first on Sachcha Sharanam | सच्चा शरणम्.